ရန်ကုန်ရှိ ဓာတ်ငွေ့လက်လီ အရောင်းဆိုင် ၂&

ရန်ကုန်ရှိ ဓာတ်ငွေ့လက်လီ အရောင်းဆိုင် ၂ဝဝ ခန့်ကို ယာယီလိုင်စင် ထုတ်ပေးမည်

လျှပ်စစ်နှင့် စွမ်းအင်ဝန်ကြီးဌာန၊ မြန်မာ့ရေနံ ဓာတုဗေဒလုပ်ငန်းက ရန်ကုန်မြို့ရှိ ရေနံဓာတ်ငွေ့ရည် လက်လီအရောင်းဆိုင် ၂ဝဝ ခန့်ကို ယာယီ လုပ်ငန်းလိုင်စင် ထုတ်ပေးမည်ဖြစ်ကြောင်း အဆိုပါ လုပ်ငန်းဌာနထံမှသိရသည်။

လက်ရှိတွင် ပုဂ္ဂလိက ရေနံဓာတ်ငွေ့ရည် တင်သွင်းသိုလှောင် ဖြန့်ဖြူးရောင်းခြင်းလုပ်ငန်းကို စနစ်တကျ ပိုမို ကျယ်ပြန့်စွာ လုပ်ကိုင်နိုင်ရန်နှင့် ထိရောက်စွာ ထိန်းသိမ်းကြပ်မတ် သွားနိုင်ရန်အတွက် လက်လီ အရောင်းဆိုင်များ ပထမ အဆင့်အဖြစ် (ဃ)နှင့်( င) လိုင်စင်များကို ယာယီ ထုတ်ပေးသွားမည်ဖြစ်သည်။

မြန်မာတစ်နိုင်ငံလုံးရှိ ရေနံဓာတ်ငွေ့ရည် လက်လီ အရောင်းဆိုင်များအတွက် ယာယီလိုင်စင်များကို ရက် ၁ဝဝ အ တွင်း အခမဲ့ ထုတ်ပေးရန် ရန်ကုန်တိုင်း ရောင်းဝယ်ရေးအရာရှိမှ ကြိုတင် စာရင်းကောက်ခံခဲ့ရာ ယာယီလိုင်စင် (ဃ) ရှိသည့်ဆိုင် လေးဆိုင်နှင့် ယာယီလိုင်စင် (င) ရှိသည့်ဆိုင် ၁၈၆ ဆိုင်ရှိခဲ့ကြောင်း မြန်မာ့ရေနံ ဓာတုဗေဒလုပ်ငန်းမှ ဒုတိယညွှန်ကြားရေးမှူး ဦးမောင်မောင်သော်က ပြောကြားသည်။

“တိုင်းရောင်းဝယ်ရေး အရာရှိတွေရဲ့ စာရင်းကောက်ခံမှုအရ ယာယီလိုင်စင် (င) ရှိတဲ့ ဆိုင်က ဒီလောက်ရှိပေမယ့် ရက် တစ်ရာ အတွင်းမှာဆို ဒီအရေအတွက်ထက် များနိုင်ပါတယ်”ဟု မြန်မာ့ရေနံ ဓာတုလုပ်ငန်း၊ ရေနံနှင့် ရေနံထွက်ပစ္စည်းများ သယ်ယူပို့ဆောင်ရေးဌာန၏ အစည်းအဝေးခန်းမတွင် ဇွန်လ ၉ ရက်က ပြုလုပ်သော ယာယီလိုင်စင် အမျိုးအစား (ဃ) နှင့် (င) အခမဲ့ ထုတ်ပေးသည့် အခမ်းအနား၌ ၎င်းက ဆိုသည်။

ရက် ၁ဝဝ အတွင်း ဆောင်ရွက်ရန် လိုင်စင်အမျိုးအစား (ဃ) ဖြစ်သည့် ဖြည့်တင်းပြီး ရေနံဓာတ်ငွေ့ရည်အိုးများကို သိုလှောင်ရုံဖြင့် သိုလှောင်ဖြန့်ဖြူးခြင်း လုပ်ငန်းနှင့် လိုင်စင် (င) ဖြစ်သည့် ဖြည့်တင်းပြီး ရေနံဓာတ်ငွေ့ရည်အိုးများကို တိုက်ခန်း၊ ဆိုင်ခန်းများဖြင့် သိုလှောင်ဖြန့်ဖြူးခြင်း လုပ်ငန်းများကို ပြည်နယ်နှင့် တိုင်းဒေသကြီးများအလိုက် ရောင်းဝယ်ရေး အရာရှိများကို စာရင်းကောက်ခိုင်းထားကြောင်း မြန်မာ့ရေနံ ဓာတုဗေဒ လုပ်ငန်းထံမှ သိရသည်။

“အရင်တုန်းက လိုင်စင်မပေးတော့ တရားမဝင် ဖြစ်နေပေမယ့် အခု ယာယီ လိုင်စင်နဲ့ အခမဲ့ထုတ်ပေးလို့ အဆင်ပြေပါတယ်၊ ဒါပေမယ့် လုပ်ငန်း ကန့်သတ်ချက်လေးတွေ ရှိနေပါတယ်”ဟု လှိုင်သာယာမြို့နယ်မှ ယာယီလိုင်စင် (င) ဖြင့် ရေနံဓာတ်ငွေ့ရည်အိုးများကို ဆိုင်ခန်းဖြင့် သိုလှောင်ဖြန့်ဖြူး ရောင်းချရန် လာရောက်လျှောက်ထားသူ ဦးအောင်နိုင်သန်းက ဆိုသည်။

ယာယီ လိုင်စင်ရ လက်လီ အရောင်းဆိုင်ကို ၂ဝ၁၆ ခုနှစ်၊ ဒီဇင်ဘာလ ၃၁ ရက် မတိုင်မီ သက်ဆိုင်ရာ တာဝန်ရှိသူများက ကွင်းဆင်း စစ်ဆေးသွားမည်ဖြစ်ကာ စည်းကမ်းများနှင့် ကိုက်ညီသည့်ဆိုင်များကို သတ်မှတ်လိုင်စင်ကြေးများ ပေးသွင်းစေပြီး ၂ဝ၁၇ ခုနှစ်၊ ဇန်နဝါရီလ ၁ ရက်မှစ၍ တစ်နှစ်သက်တမ်းရှိသည့် (ဃ) နှင့် (င) များကို ခွင့်ပြုသွားမည် ဖြစ်ကြောင်း မြန်မာ့ရေနံ ဓာတုဗေဒလုပ်ငန်းက ထုတ်ပြန်သည်။

credit: The voice weekly

www.baganmart.com

Follow Us